السبت، 17 مارس، 2012

أنا وخالو 2

طولت الغيبه ... وحشتنى حكاياتى البريئه ... لكنها الظروف ومشاغل الحياة والسفر .... وربما يكون انشغالنا بالواقع عن الرجوع للماضى الجميل

لكــــــــــن أعود لحكاياتى كعودتى الحتمية لبعض ما اتركه خلفى لأعيد التفكير فيما كان وما جرى ... للعبرة وربما لأن الحاضر ليس فيه غير ما أرفضه ....

أنا وخالو حكايات لم تنتهى

كالعادة كان خالى مخلص ماما ونينه منى ... ياخدنى يلعبنى بعيد عشان يقدرو يخلصو اى شغل عايزين يعملوه ... فى اليوم ده كان فيه محشى :) وطبعا كنت مبهدله الدنيا ... قالت ماما تعالى خدها بعيد . خالى راح واخدنى وجتله فكرة انه ياخدنى ونروح على شط بحر صغير العب هناك .
كانت معايا برتقاله :) ورحنا ... وياريته مودانى هناك جاب لنفسه التعب هههههه
كل  دقيقه اروح لعند الشط واقعد اقرب لعند ما اشوف صورتى اقعد اضحك طبعا يقوم يجرى ورايا يلحقنى عشان مقعش واغرق
فضلنا على كده يجيبنى واروح تانى وتالت لعند ما زهق

هو دايما يجيبه لنفسه :)

*********

كنا قاعدين انا وهو قدام البيت وطبيعى احنا فى ريف وكل الناس يعرفو بعض وحتى لو ميعرفوش لازم اللى يعدى يسلم على اللى قاعد

يومها عدى ناس كتير اوى وانا قاعده جنب خالى ... كل ما يعدى واحد يسلم على خالى وهو يرد السلام
وانا كل واحد يعدى اقوله مين ده يا خالو .. مرة واتنين وعشرة خلاااااااص بقى على آخره
مرة يكون عارف الشخص فعلا فيقول اسمه وطبعا لازم اسأل ومين ده قريبا يعنى ههههههه
وازاى خالى ميكنش عارف مين ده امال بيسلم عليه ليه

واحد ميعرفوش .. طب بيسلم عليك ليه ... احنا مسلمين وده واجب ... يعنى ايه واجب ... 0_0

وسؤال ورا سؤال لعند موصلته لمرحله الغضب وبدأ يزعقلى اسكتى بقى افصلى هههههه
رؤى خلاص متسأليش بقى .. هضربك ...
عدى واحد بعدها هو متوقع انى هسأل ... بس انا سكت وبصيتله بصه خبيثة ضحك
عدى واحد تانى فسألت على اعتبار ان ابتسامته معناها انه ادانى الامان

راح حالف لو فتحتى بقك هضربك
ههههههههه رحت فاتحه بقى من غير ما اتكلم
مات على روحه من الضحك

***********

فى ليله من ليالى الشتا الفظيعه الدنيا غرقانه والشوارع صعب حد يمشى فيها والنور قاطع
كنت انا وماما وبابا عند خالى وخلاص لازم نروح ... اصريت افضل عندهم  ويدوب لسه مكنوش وصلوا البيت بكيت ولازم خالى يروحنى لماما :)
معلش وديها هتفضل تعيط للصبح ... ودانى لماما :)
يدوب هو وصلنى ومشى
عايزة خالووووو ودونى له
ودونى لخالو وهكذا لطلوع الفجر

هما طبعا مكنوش فاهمين انا عايزاهم كلهم مع بعض :) مليش دعوة انا اعملهم ايه مفهمونيش :)

*********
حكاية التلفيون :)

كان زمان ايام التليفون ابو قرص .. الارقام كانت 3 ارقام .. يعنى تضرب اى 3 ارقام يرد عليك اى حد
مكنتش اعرف رقم حد لكن دايما كنت بجرب واقفل بسرعه :)
فى اليوم ده كان خالو عندنا واصريت الا اضرب رقم واتكلم  بعد محايله قالى طيب مرة واحده واوعى تقولى خالو جنبك لو حد سألك
ماشى
اتصلت ايوه يا حبيبتى انتى مين وعايزة مين
ايوه يا طنط انا مش رؤى وخالو على مش جنبى :)

هههههههه كان هيموت من الضحك والكثوف يومها لان الاسم معروف وسهل اى حد يعرفنا :)

 مرة تانية واحد رد عليا قالى اسمك ايه قلتله رؤى
وانت يا عمو اسمك ايه قال بابا عبده :) افتكرت بجد فؤاد المهندس وقعدت انادى البيت كله ههههههههه

**********

حكايات صغيرة لكن دايما بضحك وانا بفتكرها بعد المرور على جسر الحاضر الذى يربطنا بالماضى 

هناك 17 تعليقًا:

  1. رحت فاتحه بقى من غير ما اتكلم مات على روحه من الضحك
    مليش دعوة انا اعملهم ايه مفهمونيش
    انا مش رؤى وخالو على مش جنبى

    ـــــــــــــــــــــــ

    أسلوبك جميل جداً .. تصويرك للأحداث ولغتك الحماسية واضحة أوي في النص حسستني كأني أنا اللي عشت الذكريات دي :))

    لك أطيب تحية وأعمق تقدير واحترام

    ردحذف
  2. شكرا لك
    دى لغتى وانا طفله اما الان فاعتقد ان الايام قد كسرت رأس السهم المندفع لتجعله يسير ببطئ او ربما يسمون هذا البطء عقل وهدوء

    شكرل لتواجدك
    وهناك فى رؤى تجد الواقع وما حالتنى اليه السنوات :)

    http://roaa3lewa.blogspot.com/

    ردحذف
  3. رووووووووووووووووعة والله موتيني من الضحك جزاكِ الله خيراً
    لولا

    ردحذف
  4. هههههههههههههههه
    حقاً اشتقنا إليك يا رؤى
    وجميلة هي مذكراتك أيضاً عزيزتي
    سلمت يداك
    وشكراً على البسمة التي رسمتيها على شفاهنا
    شكله خالو كان برضه شقي :)

    ردحذف
  5. لولا منوووووورة سعيدة بمرورك

    ولعلك تأتينى هناك ايضا حيث اسكن الان

    http://roaa3lewa.blogspot.com/

    ردحذف
  6. نسرييييييين وحشانى كده متقوليليش حمدالله على السلامة سافرت وجيت ومفيش مرة تدخلى تسألى
    ماشى مسامحه اكيد البنات مغلبينك كيفهم وحشتنى حكاياتهم

    دمتن بخير

    ردحذف
  7. والله معرف انك كنتي مسافرة يا بنتي
    أنا يا بنتي خارج الخدمة محدش يلومني بلييييييييييييييز
    يدوب افتكر اسمي اصلاً ههههههههههههههههههه
    والله لو مكنتيش كاتبة ان اسمك رؤى في المدونة هنا،، عمري ما كنت افتكر :)
    ع العموم
    ألف الحمد لله على سلامتك يا قطتي :)

    ردحذف
  8. ماشى يا ستى الله يكون فى عونك مش هلومك بس لو دخلتى رؤى كنتى عرفتى
    هنا عالم الطفولة زمان لكن دلوقتى له مكان اخر :)
    http://roaa3lewa.blogspot.com/

    ردحذف
  9. جميله حكاياتك البراءه واﻻجمل ان في حد مشاركك فيها
    ربنا يخلي خالو
    تحياتي

    ردحذف
  10. اممم هى فعلا جميله يا وصف لكنها ما عدتش موجوده حتى العيال الصغيرة مبقوش زينا زمان

    دمت بخير

    ردحذف
  11. رؤى الجميله صاحبه الذكريات الجميله البريئه
    استمتعت بحكاياتك وضحكت كثيرا
    بوست مميز ورقيق يحمل ذكريات جميله ورائعه

    ردحذف
  12. مميز بمرورك يا هبة

    يسعدنى دايما تعليقك

    دمت بخير

    ردحذف
  13. ههههههههههههههههههههههه يخربيتك بجد موتيني من الضحك...
    ده انتي كنتي مجرمه...بس طبعا زي العسل

    ردحذف
  14. شكرااااااااااا شكرااااااا هعتبر ده اطراء هههههههه

    منورة يا اميرة بس على فكرة ده كان زمان

    الجديد بقى غير كده خااااالص

    http://roaa3lewa.blogspot.com/

    ردحذف
  15. السلام عليكم اخت شيرين::: ممكن استاذن حضرتك للانضمام معى فى مدونتى البسيطة هذه لأنى وبكل صراحة لم اعرف احد من الاصدقاء عنده مدونة واعتذر:::

    http://samiaboserea.blogspot.com/

    ردحذف
  16. ماشاء الله
    لطيفة كده الحكايات
    الذكريات الجميلة والحنين للماضي
    احاسيس جميلة
    يابخته اللي بيعرف يترجمها كلمات

    :)

    ردحذف
  17. استاذ سامى انا مش شيرين بس مفيش مشكله نرووووووووووح اللينك نشوف ايه هناك


    ************

    شمووووووسه منورة بجد تعرفى فعلا مش فى كل وقت بعرف اكتبها لازم تحضير غير اللى بكتبه فى رؤى خااالص

    دمت بخير

    ردحذف

مرحبا بكم فى عالم طفولتى