الأحد، 20 مايو، 2012

الأفراح وفرقة حسب الله

حكاية جديدة من حكاياتى زمان .... واحساس مختلف وبراءة اكتشفتها بعد ما مر الزمان 

ولأنى بقالى كام يوم بفكر أكتب نبضات مختلفة ( فى رؤى ) فلقيت الحكاية دى بتلح عليا عشان ألونها هنا فى صفحات  كلماتها من زمن البراءة

المرادى الحكاية عن أفراح زماااااااااان ... صحيح أنا مش من زمان أوى بس يمكن الفرق كبير بين وقتها ودلوقتى ..

****************

من البلكونة بتفرج على فرح معدى فى الشارع 

المشهد مفرح لدرجة لا توصف وتفاصيل الزفة حاجة مبهرة مش وقتها بس لكونى كنت طفلة لكن حتى الآن تبهرنى هذه التفاصيل ربما لأن الفرحة التى كنت أشعر بها فى وجوه أصحاب الفرح لم تعد موجوده رغم إن الأفراح أصبحت أكثر رقى وكلفة لكن لاعلاقة بين التكلفة والسعادة 

شكل الزفة بقى 
فى الأول الرجالة الكبار من أهل العريس والعروسة ماشيين قدام ..... ووراهم زفة حسب الله طبعا دى كانت أحسن زفة 
طبلة كبييييييييرة ... وصاجات كبييييييييييييرة .. ومزمار وبجد كانت الألحان مبهجة جدااا 
وسط الزفة الشباب بيرقصوا ....... بس طبعا رقص رجااااالى مش زى دلوقتى وممكن بالعصايا .... 
وراهم بيكون فيه حصانين للعريس والعروسة ..... وهنا بقى كانت عينى تقف .. :) هى العروسة مش خايفة ؟؟   طب وأنا عروسة هركب إزااااااااااى على الحصان ؟؟ طب لو كان حصان شقى وقعد يرقص على الموسيقى هعمل إيييييييه ؟؟ كانت مشكلة بجد المفروض أحلها وبصراحة مكنش فى بالى موضوع تغيير الزمن وإنه هيعدى موضوع الحصان وندخل فى العربيات ويمكن الموضوع يوصل لزفة بالطيارة :) لكن عموما كان منظر رااااااااائع بغض النظر عن احساس العروسة أو خوفها وخاصة لو حصان فعلا شقى .... ودى ممكن تبقى عملة بايخة من العريس هههههه 

بعد الحصانين بتمشى الستات شايلين العزومة ( وهى بتبقى من بيت خال العروسة يوصلوها لعند بيت العريس وهما شايلنها وقاعدين يصقفوا ويغنوا أغانى الناس زمان 
مش فاكرة اغانى كتير لكن كانت فيه أغنية دايما معلقة معايا 

الليلة ليلة هنا وسرور وكبايات فى صوانى بتدور والليلة ليلتك يا عروسة .... وزغروطة بقى :) 

كنت بحبها جداااا خاصة وهى مربوطة جوايا بشكل كبايات الشربات الملونة أحمر ودهبى وأخضر وأزرق ... 
والشربات طبعا كان حاجة جميله أحلى كتير من جو الحاجة الساقعة 

طقوس كتير إختلفت عن أفراح زمان 
مبقاش ناس كتير يعملوا الكحك والبسكوت ... زمان كانت الناس تدعى الستات عشان يعملوه فى بيت العروسة ويقعدوا يغنوا وهما بينقشوا وبعدين اهل العروسة يوزعوا على كل الأهل والجيران والأصدقاء من الكحك لما يتعمل مبقاش ده كله موجود 

ليه الناس بقت تختصر فى أيام السعاده والأفراح .... وبعدين نشتكى مبقيناش نفرح !!!!! 
ايه المشكله ان البيت يفضل شهر الناس تدخله وياكلوا ويغنوا ويرفرحوا مع بعض !!!!

زمان بجد كان فيه أفراح جميله ........ صحيح الفرح جوانا ...
لكن بتكلم هنا عن وجهة نظر طفلة بتتفرج من البلكونه على أفراح بتعدى فى الشارع وشاغلها جداااا ازاى هتركب على الحصان وهى عروسة :) 

أدام الله علينا الأفراح ...... أيا كان شكلها