الجمعة، 22 مارس 2013

ماما وحكايات براءة من جديد


ماما وحكايات براءة من جديد 
حكايات عشتها معاها فى سنين 
وإزاى هقدر ألخصها فى سطور 
لكن إشارات عن بعض ما كان بيننا 


*******

هو ليه عيد الأم بيجى مع أول الربيع ؟؟

يمكن لأن ربيعنا بيبدأ من عندها 
ويمكن لأنها الربيع نفسه مهما عدى الزمن 


وفيها من الربيع 


بهجة ألوانه و دفء هواءه

حتى خماسينه لم تغب عنها


********

 أبدأ منين ؟ من أول حاجة شوفتها وحبيتها 
أول كارت أهدتهولى ماما فى عيد ميلادى الأول 
بحبه جدا وأول ما شوفته كنت فى ثانوى فرحت بيه أوى
 وحسيت إنى على علاقة بماما من زمان :) 
وزمان مسكته مرة وقعدت أعيط كتييييير لأن ماما كانت مزعلانى 
أكيد فيه معنى خفى ..
 وكأنى بقولها إيه حصل محنا كنا حلوين مع بعض زمان
هييييييه كانت قصه جامده 



لما إخواتى شافوه قالوا ليه ياماما مكتبتيش لكل واحد منا زى الكارت ده ( وهما غيرانين ) قالت : عشان إنتو مش رؤى ^_^

******

الموضوع كبييييييييير !
مش سهل يتلخص أبدا دى علاقة بحجم العمر الذى مر بعدد ثوانيه فلها فى كل ثانية مرت حكاية وتأثير ..


أمى مؤثرة ، نصوحة ، دافعة ،  لا تمل من المشى ورائنا فى كل خطوة وإن مللنا نحن وعبرنا عن مللنا بكلام وأفعال .


*******
لو المرفوض إنى أحكى حكايات من زمن البراءة حصلت بينى وبين ماما يبقى المفروض المدونة كلها تكون بعنوان أنا ومامتى

*******

ويحضرنى الآن يوم عيد الأم زمان 
الهدايا نفسها كانت عجيبة 
وكان لابد أن يتوافرفيها شرط  ( تنفع للكل ) وياترى ايه اللى ينفع للكل
أكييييييييييد أى حاجة بتتاكل
وأكيد مش هنهون على ماما دحنا لسه جايبين لها هدية يعنى 
فاكرة إن كان فيه أطفال بيجيبوا إزازة شربات :) 
شكل الهدية كانت مشتركة للشارع كله هههههههه


كانت حاجة جميله إن ماما تساعدنى إنى أجيب هدية لمدرستى فى الإبتدائى 
لأننا كنا بنقولها يا ماما وبجد كانت تستاهل ( ربنا يديها العمر والصحة )

من أجمل الهدايا اللى أفتكر إنى أهديتها لماما فى عيد أم 
كان كارت على شكل قلب عملته من الورق الملون وربطه بشرايط من الجنب
 وكتبت جواه لماما 

************

بحاول هنا أفتكر مواقف طريفة بينى وبين ماما 


ربما تأتى فى مدونات لاحقة 
أصل الحكايات أكيد مش هتنتهى بنهاية يوم عيد الأم 

وكمان لأنى أعرف ماما من زماااان وعلى علاقة يا ما حصل فيها
 ودى عشرة عمر ^_^


كل سنة وانتو وماماتنا بخير 
عايشين على تعليماتهم 
وبنحقق أحلامهم 
طبعا كلنا مطيعين جدا ^_^

وربنا يرحم كل أم توفت 
و تركت ولاد يدعولها 
ويوصلها الثواب كهدايا فى عيدها 







هناك 36 تعليقًا:

  1. الله يحفظك
    ويرحم كل الامهات اللى ماتوا

    ردحذف
  2. أمى
    يعنى نبع حنان وعطاء لا ينفد
    بالنسبة للهدايا فأحب أقول انى من صغرى يوم عيد الأم أقول لماما فين هديتى ^_^
    وفى كل مرة أمى بتحرجنى وبتجيب لى هدية بجد
    أمى لو عليها تجيب لى الدنيا كلها
    بتحرجنى بتحرجنى يعنى :)

    ربنا مايحرمناش من أمهاتنا ابدا

    ردحذف
    الردود
    1. ههههههه شكلهم كلهم بيحبوا يحرجونا بس مش مشكله بقى الناس لبعضها :)

      ربنا يخليهم ونقدر نسعدهم

      دمتى بخير موناليزا
      وعقبال ما اولادك يعملوا فيكى كده

      حذف
  3. أصل الحكايات أكيد مش هتنتهى بنهاية يوم عيد الأم

    مين يقدر يختصر عمره فى كلمتين :)

    ربى يخليهالك حبيبة قلبى ويبارك فى صحتها ويجعلها من الصالحات يااااااارب

    كل سنة وهى طيبة وبخير وكل امهات المسلمين

    تحياتى لك بحجم السماء

    ردحذف
    الردود
    1. اللهم امين
      يارب يا ليلى تفرح بيا :)
      ويارب ربنا يخلليلك والدتك وتفرح بيكى :)

      دمت بخير حبيبتى

      حذف
  4. عجبني كلامك أوي عن أمك يا رؤى
    ربنا يخليهالك

    ردحذف
    الردود
    1. تسلميلى نسرين ويارب عقبال ما تحتفلى مع بناتك الحلوين وتفرحى بهداياهم

      دمت بخير حبيبتى

      حذف
  5. كل عام و كل الامهات بخير
    كل عام و كل البشر بخير

    ردحذف
  6. أتمنى تشاركينا الحضور
    ولو مش هتقدرى لا قدر الله

    يبقى تشاركينا الدعوة لليوم


    http://fritend.blogspot.com/2013/05/blog-post_20.html

    بوست لله يا أولاد الحلال

    ردحذف

مرحبا بكم فى عالم طفولتى