الاثنين، 16 أبريل 2012

الكهربا والسور

رجعنا تاااانى وكالعادة بعد غياب ومحاولات وهروب ... غياب بسبب المشاغل .. ومحاولات لإستعادة حالة البراءة والخروج من حالات الغم والزحمة المصاحبة للحياة ... وهروب من عالم الواقع لعالم تملأه الضحكات واللامبالاه 


المرادى حكايات شقاوة غير عادية أستغربها فى نفسى ... ولا أعلم ما هو رد فعلى لو رأيت أحد الأطفال يفعل مثلما كنت أفعل فى هذه السن الصغيره 

الكهربا  0_0 

ممكن تلاقى كتير من الأطفال يلعب فى فيشة كهربا أو سلك طالع ده طبعا خطر وبننزعج جدا من المنظر 
لكن أنا دائما مختلفة :)

فيشة الكهربا مكنتش بحط صباعى فيها عادى كده يعنى دنا كنت ببحث ياترى إيييييييه جوا الخرم ده طب ليه هما أصلا خرمين وموصلين لفين ؟؟ وإشمعنى لما نيجى نشغل راديو أو تلفزيون لازم نحطه هنا ؟؟أسئلة عبقرية فاكره نفسى وأنا بفكر فيها
وفى يوم وطبعا ماما فى المطبخ مينفعش أصلا أكتشف حاجة وحد بيتابعنى !!

قعدت أدور على حاجة رفيعه أدخلها جوا الخروم دى يمكن اعرف إيه أخرة الموضوع وفعلاااااا لقيت مسمار نيهههههههااااا 
ودخلته جوا الخرم وعييييييييييييينك ما تشوف إلا النووووووووور :))
لكن ما حدث قد حدث ولازلت أجهل ما السبب طب إيه موضوع الرعشه دى بقىىى  لأ الموضوع يحتاج لإصرار بجد
ومرات بعد كده أدخل أى حاجة أشوفها ودايما كانت أشياء زى المسمار .. بنسة شعر .. أى حاجة تحدث رعشه كانت لذة غريبه موضوع المخاطرة الواضح إنه كان بيستهوينى جدااا 

وطبعا الموضوع وفكرة البحث تنتهى كالعادة بعلللللللقة ... هههههههه  ونقاش حاد وأخد وعطا عشان أقتنع إنى معملش كده تاااانى :)

*************
السور بقى :)

كنا فى الدور التانى وكان لنا جيران وبناتهم صحابى أقول لماما أروح ألعب معاهم فمكنتش ترضى..  ياماما.... أبداااا ده معاد نوم .. ده معاد غدا ... ده عندهم ضيوف ... دحنا خارجين ..
وبعدين بقى فى الموال ده ......
كان بينا وبينهم بلكونه مشتركه بيفصلها سور عادى يعنى بس السور ده بقى كان سايب بتاع خمسة سم ناحية الشارع 
وإيه المشكله نقفل البلكونه علينا ... ونطلع فوق السور بتاعنا ... ونعدى الناحية التانية عااااادى جداا 
ده كله فى سن قبل المدرسة ... 
أحلى حاجة لما جارتنا مامت أصحابى شافتنى بعدى بالطريقة دى يعينى أتثبتت مكانها واترعبت ومعرفتش تعمل إيه ...... والله يسامحها بقى جابتلى الضرب راحت قالت لماما 

الطريف جدااااا فى موضوع السور هو تفكيرى وقتها 
لأنى مكنتش بعمل أى حاجة من غير تفكير ... عامله حساب إنى لو اتزحلقت مثلا ... كانت الخطة إن فيه حبال غسيل وطبعا أنا مش تقيله أوى فهمسك فى طرف الحبل هيروح مقطوع لكن هيوصلنى لقريب من الأرض ممكن بقى أنط الحتة دى لعند الأرض 0_0 

كان دايما فيه أيام الحصاد ناس بعربيات ومحملين القش من أراضيهم للبيت المهم العربيات دى كانت دايما بتعدى من تحت البلكونه 
جه فى بالى مره إنى أنط على واحده منهم ههههههههه
طبعا كنت عامله حساب إنها ماشية ومش واقفه فكنت مقرره إنى أنط قبل ما توصل تحت البلكونه بالظبط :))

والله كنت عبقرية بس الخوف مخلانيش آخد راحتى وأتشاقى كما يجب أن يكون :))

وإلى حلقة شقاوة قادمة :) 
*****************


على فكرة فى المدنة دى أنا فعلا بضحك من قلبى وكأنى بكتشف نفسى وبسمع حواديت وبكتب بالطريقة اللى كنت ممكن اتكلم بها زمان وأنا بحكى لحد حكاية 
لكن مدونتى الأولى فيها من الواقع أكثر
لذلك أنا فيها أكثر من هنا 
رؤى

هناك 34 تعليقًا:

  1. ههههههه واضح انك شقية وعفريتة بس تعرفى واضح بردو انك انسانة ذكية وبتحبى تفكرى وتبحثى عن اسباب الاشياء

    مشكلة الكهربا والمسمار حصلت لأخويا بنفس الطريقة بس عينى انا اللى ماتشوف الاالنور لانى اتخضيت جدا وقتها عليه وشعر راسه بقى شكله غريييييييييييب هههههه

    ربى يسعد قلبك حبيبتى

    تحياتى لك ولخفة ظلك

    دمت بخير

    ردحذف
    الردود
    1. نورتىىىىىىىى يا لولى
      بجد سعيدة بمرورك العطر

      انا فعلا كنت شقية جدااا بس الغريب انى دلوقتى هاديه مالم ينكشنى احدهم ههههههههه

      دمت بخير

      حذف
  2. انا قلبي ارتعش من قراءه مدونتك
    اومال انا لو كنت شوفتك اصلا
    كنت حاعمل ايه
    الله يكون في عون والدتك عندما علمت بهذا كله
    تحياتي

    ردحذف
    الردود
    1. هههههههه والله بجد لما بفتكر بقول كان عندها حق تبقى عصبيه

      بس نعمل ايه بقى
      الحمد لله انى هديت دلوقتى :))

      دمت بخير

      حذف
  3. ههههههه
    ضحكت كتييراً عندما قرأت هذه التدوينة ..
    تذكر تشقاوتي .. وليست غريبةً علي تلك الرعشه التي تضربنا عندما نلمس شريط الكهرباء ..
    وقد فعلت الشيء نفسه بالمسمار وربما تعرضت للكهرباء قريباً من 30 مرة ..

    أما السور .. ففعلاً يدل على ذكاء حيث الخطط البديلة والأخذ بالاحتياطات اللازمة لتفادي الحوادث ..
    ههههههه

    فعلاً طفولة رائعة .. أرجو أن تستمر سطورها هنا ولا تنقطع ..
    ففي هذه القصص راحة للقلب وأنيساً للروح من أعباء الحياة الثقيلة ..

    كوني دائماً شقيةً .. أقصد سعيدةً وبألف خير .. هههه

    ردحذف
    الردود
    1. ستستمر حتى عمرا تحولت فيه القصص لشئ آخر ليس مضحكا على الإطلاق


      دمت بخير :)

      حذف
  4. السلام عليكم
    سواء كنت فى هذه المدونة أو الثانية فأنا بستمتع جدًا بمواضيعك وحكاياتك.
    بالنسبة لموضوع الكهربا فانت فكرتينى بأختى الكبيرة دايمًا كانت تحب تعرف وتسأل وتكتشف بنفسها الحمدلله..طبعًاالكبار اللى بيحكولى عنها.
    أما عن السور فكرتينى ببيت جدى الله يرحمه..فيه من طفولتى كتـــــير..الواحد وهو صغير كان شــجاع أوى ويسأل نفسه ايه اللى هيحصل يعنى ؟؟!!..وكل ما يكبر كل ما يزيد الخوف معاه وتزيد توقعاته الســيئة للأسـف.
    يا ريتنا كنا صغار مكناش بنحسب حاجة أبدًا وكان كله بيعدى.
    طولت عليكى معلش..
    دمت بخير.

    ردحذف
    الردود
    1. نورتى ومطولتيش ولا حاجة اكيد مش انا بس اللى عندى حكايات

      الطفوله اهم ما يميزها الانطلاق وعدم الخوف وعدم تحمل المسئولية عشان كده بتكون لذيذة


      دمت بخير

      حذف
  5. نقدر نقول ان شقاوتك في الطفولة كانت محسوبة
    :))
    بس بجد انك تفكري انك تنطي قبل العربية ماتيجي تحت البلكونة دي عبقرية فعلا

    ردحذف
    الردود
    1. هييييييييه عبقرى مش فى زمانه ولا مكانه هههههه

      تصدقى معرفش اذا كنت لسه زى منا ولا لا بس غالبا فى المواقف بتظهر طريقة التفكير ومقدرش اقول انى سطحية ولا بحب التافهين
      وكل معاناتى انى نفسى اكون حااجة ومش اى حاجة


      دمت بكل خير

      حذف
  6. رؤي
    بعد جرعه الكهرباء ال انتي اخدتيها دي
    ومع كميه العلق ال اكلتيها بالهنا
    اسمحيلي اسالك سؤال
    انتي لسه عايشه ازااااااااااااااي
    ربنا يديكي الصحه يارب
    ههههههههههه
    تحياتي

    ردحذف
    الردود
    1. هههههههه والله سؤال منطقى يا وصف
      وزيادة على ما ذكرتى كمية الكهربا والعلق اللى خدتها بعد كده من الدنيا والناس

      الحمد لله لسه عايشه ودى معجزة العصر تتجلى أمام ناظريكم هههههههه

      دمت بخير

      حذف
  7. واضح ان الكهربا جابت مفعول كويس معاكِ ...الله ينور يا عم :)
    وبرضو تحياتي الحاره للست الوالده اللي كنتي مجنناها.

    ردحذف
    الردود
    1. ههههههههه لو شافت كلمتك هتقولك ولسه هههه
      والله بقيت بدعى ربنا يكرمنى عشان هى تفرح بس :)


      تحياتى لمرورك العطر نيسان

      حذف
  8. مساء الخير..
    قرأت الموضوع وانا اضحك.. واهم حاجه لما قلتي العربيات بتاعة ايام الحصاد وفكرتي تنطي قبل ماتوصل لانها ماشيه هههههههه يعني خطه محنكه مش اي كلام :D

    فرصه سعيده اختي انو زرت مدونتك وكانت صدفه جميله بصراحه..
    اختك نور-العراق

    ردحذف
    الردود
    1. حبيبتى نور نورتى
      والعراق لها جزء من قلبى ( فهى وطنى وميلادى كان فيها )


      سعيده لانك ضحكتى :))

      حذف
  9. هههههههههه روعة يارؤى

    ربنا يسعدك

    ردحذف
  10. انا كمان بضحك لما بادخل هنا كثير وواضح انك كنت طفلة شقية جدا و دة شئ لذيذ فى الاطفال بس بيرعب الاهل جدا

    تحياتى

    ردحذف
    الردود
    1. :)
      الله يسعدك ودايما تضحكى :))


      دمت بخير

      حذف
  11. هههههههه ... بالتوفيق لك يا شقية ههه
    سرنى التواجد هنا
    سورى على التقصير بسبب الدراسة
    تحياتى

    ردحذف
  12. دة انتى طلعتى فظيعه
    وجمال وشفاوه لم نكتشفها بعد
    بما انك كنتى خطرة كده وبتعملى كل دة
    يبقي انتى اللى سرقتى مشابك الغسيل بتاعتنا ههههههههههههههههههه

    انا يحكى ان العبد لله اللى هو انا كانت جباره وبتفعص العيال وبتششاقي زياده عن اللزوم بس انا مش فاكرة غير اول ما بدات ادخل كجى1 وكجى 2 بس
    ^_^

    بس موتينى من الضحك بيجد يعنى ربنا يسعدك ياقلبي :)

    ردحذف

مرحبا بكم فى عالم طفولتى