السبت، 30 يونيو 2012

رحلات الغيط



كالعادة أعود هنا عندما يرهقنى هناك  ... أعود للطفولة أو أهرب لها وإن كان الهروب لا يجدى ... إلا أنها لحظات تخفف عنى وطئة ما كان واقعى 


كالعادة أعود لأتذكر حكايات صنعتها فى طفولتى فصنعتنى أنا رؤى .. لأكمل بها وبدونها حياتى فى آن واحد 

حكاية اليوم كغيرها من حكايات الشقاوة .. مختلفة كغيرها أيضا من الحكايات التى تنفرد كل منها .... ثم تجتمع لتكون ... رؤى فى أيام البراءة ... الأيام فقط هى من كانت بريئة ولم تصبح كذلك ... لكنى أنا سأظل كما كنت وإن إختلفت الحكايات وإختفت وحلت مكانها معانى أخرى وحكايات أكثر غرابة لكنها لم تكن بفعلى أنا بل إن جاز التعبير أصبحت فى محل المفعول به !!!


اممممم شكلى كده هقلبها نكد ( الواقع ) ... وطبعا ده لا يجوز هنا 

حكاية النهرده عن مكان ربما ورثت حبه أنا واخوتى ... الغيط ... هكذا نطلق على أرضنا الصغيرة  التى ورثها بابا عن جدى واللى كان نصها مهر ماما ( ماما تحب تذكر قصتها وتنوه عن أن مهرها كان أرض غاليه ^_^ ) 

الأرض يمكن كمساحة مش كبيرة لكن عندنا تساوى أكتر كتير من عزبه ... كتير من المواقف كان يبقى فيه قرار إنها تتباع لكن الغريب كنا أطفال وكنا نقول لا يا بابا إلا دى ... ولعند دلوقتى ... إلا دى !!

أما عن المزروع فى الأرض بقى هو ده بيت القصيد فى الحكاية النهرده .... من واحنا صغيرين وبابا دايما يعمل مشاريع بعيد تماما عن مجاله وكانت تنجح لكن الاستمرار فيها كان صعب عشان شغله وهى عايزة تفرغ 
كان من ضمن المشاريع اللى اتعملت فى الأرض .. منحل عسل ... والعنب

الاتنين دول بالذات مختلفين بالنسبالى عن غيرهم من الزراعات اللى اتزرعت هناك أو المشاريع اللى اتعملت 
المنحل لأنه كان بيبقى يوم عيد يوم ما يجيلنا عسل كتيييير ونقعد نوزع على الجيران ... عسل بجد ( من منحلنا ) وكله كوم وشمع العسل ده كوم تانى كان طعمه تحفه .. جربت بعدين ادوق شمع من اى منحل تانى لكن هنااااااااك فرق .. ولا يزال الفرق وأظنه سيظل . لكن المنحل كان صعب نروح الأرض وهو فيها ممكن من بعيد نشوفه

أما العنب فالأمر مختلف تمامااا 

كانت أجمل رحلات عملناها ..كنا نتجمع عائلات من القرايب والأصدقاء والجيران وكلهم عندهم أطفال صغيرين فى سننا أكبر شوية أو أصغر شوية كله فى سن قبل المدرسة 
مستلزمات الرحلة ( أطباق كبيرة  ، وجراكن مية ، والحتة الخضرة هههههههه كنا بنقعد عليها وكان لونها أخضر عشان كده اسمها الحتة الخضرة، الكاميرا  ).


نقطف العنب .. نغسله ... ونااااااااااااكل 


مرة من المرات التى لا تنسى أبدا ... قعدنا ناكل عنب و ناااااكل طول النهار فى الارض وبعد ما رجعنا كان سكرررررررر بجد ومن غير اى كيماويات كان لونه اصفر محمر طبيعى والحباية صغننه اوى .... المهم بقى على باالليل كانت المشكله ... وشنا بقع ههههه  وفضلنا تقريبا 3 ايام نمشى مكسوفين بس بنضحك ... كنا بنقول لأخويا ( اخويا بس ) انه طلعله شنب وهو صغير هههههه




أجمل ذكريات .. والصور كلها تحفه بحبها اوى تقريبا من اجمل الصور بالنسبالى 
كنت بدور عليهم من فترة ولاقيت صور مكنتش فاكراها 
لاقيتنى راكبه على عربيه كارو مع واحد كان معدى علينا واحنا قاعدين وبما اننا نمارس حياة الريفيين وقاعدين فى الغيط فيبقى ناقص انى اركب عربية كارو :) الصورة جاية وانا راكبة ومتمكنه وجنبى العيال بيعيطوا وخايفين ( طب ركبوا ليه اصلا ) بس الحقيقه مكنتش راكبة على العربية نفسها انا كنت راكبه فوووووووق البرسيم اللى فوق العربيه واللى تقريبا كام متر لفوق 0_0 


كان أخواتى دايما هما والأطفال اللى معانا يركبوا حصنه ( بوص وعصيان ) ويفضلوا يجروا هههههه 


كان فيه عشه كمان على راس أرض جنبنا كان جدو عامل فيها سرير من اغصان الشجر وحاطط قُلِة مية ( عمرى ما دقت مية بالطعم ده ) السرير كان تحته مصفة مية ( جدول يعنى ) 


كنا بنعمل مراكب ورق ونقعد نمشيها فى مصفى المية ونزق فيها والشاطر اللى يوصل مركبه للنهاية دايما لما كان يبقى مليان مية يبقى فيه سمك صغنن نقعد نحارب فيه بالعصيان :) 


يااااااااااه من اجمل الأيام بجد 
صحيح عايشين فى الريف لكن الرحلات دى بس اللى كانت بتحسسنا اننا فى الريف وجنبنا أراضى زراعية ومية وجو تحفففففه ..


حتى لو الأرض لسه موجوده ... لكن أنا كبرت خلاص ... والعيال كمان كبروا ... والطفولة اختلفت معانيها كنا احنا بنسمع اغانى اطفال مش افلام ... 


هى معانى البراءة ليه اختلفت ولا عشان احنا كبرنا مبقيناش حاسينها !! 


عموما هتفضل الذكريات الجميلة موجوده ومن وقت للتانى لازم نرجعلها عشان نقول عشان ايام جميله 


يارب المستقبل كمان يكون اجمل 




هدية بقى اسمعوا دى :)) 






هناك 47 تعليقًا:

  1. في زمن الطفولة عشنا الطفولة ..
    وأما الآن فالطفولة تعيش بعيداً في أعماق قلوبنا ..
    لكنها تختفي في زحمة الحياة ..
    حتى إذا جاءت مثل هذه اللحظات .. برزت طفولتنا كأجمل ما نتزين به في عالمنا المليئ بالآلام ..
    رائعة .. عشنا الذكريات كما لو كنا في الغيط .. With You ...
    دمت بألف خير ..

    ردحذف
    الردود
    1. هههه والله هنا انا فعلا بضحك
      من وقت ما بكتب وكل تعليق بشوفه

      ربنا يهون علينا جميعا

      دمت بخير اخى

      حذف
  2. ما شاء الله..ذكريات جميلة أوى أوى..وطفولة بمعناها الحقيقى
    يا رب دايمًا تكونى بخير والمســتقبل هيكون أجمل بإذن الله

    ردحذف
    الردود
    1. شكرا لمرورك يا حبيبه
      يارب المستقبل يكون افضل فعلا

      دمت بخير

      حذف
  3. في حاجات بتمر علينا لا يمكن ننساها مهما كبرنا ومهما خدتنا الدنيا من نفسنا او توهنا فيها ومنها وذكريات الطفولة هي الاساس اللي بنكبر عليه واللي مالوش ماضي مالوش حاضر
    احسنتي الوصف
    تقبلي مروري

    ردحذف
    الردود
    1. شكرا لمرورك
      وصح جدا اللى ملوش ماضى ملوش حاضر ببساطه لان جزء من الحاضر الذكريات


      دمت بخير

      حذف
  4. وأنا لسه فى نص الكلام حسيت إنى باسمع الأغنية بشقاوتها وذكرياتها
    ولما وصلت لنهايته فوجئت بيها

    كنت كتبت زمان عن أرضنا
    وعن التوت وسرقته
    وأكله
    وحاجات كتير فى ذكريا
    وحاول أدور وأجيب اللينك ما عرفتش

    ذكريات الطفولة والبراءة هى زادنا على الطريق
    بكل تعقيداتنا لما بنكبر وتزيد مسئولياتنا

    تحياتى دوما

    ردحذف
    الردود
    1. ههههه توارد افكار من ايام زمان
      كانت اغانى بجد تحفه


      حاول تكتب ذكرياتك تانى

      دمت بخير

      حذف
  5. اقصى امنياتي اني اعيش في غيط يكون في شجرة احط تحتيها كنبة و اقعد عليها طول اليوم
    بس امنية صعبة جدا تتحقق
    حلوة الذكريات يا رؤى و جميل اننا نعيش معاها
    تحياتي

    ردحذف
    الردود
    1. الغريب ان الحجات القريبه كمان بقت صعبه حتى لو بسيطه اوى

      بفكر فى الحجات اللى ممكن اعيش بيها واون مبسوطه الاقيها بسيطه ومستحيله


      انا بهرب لها بصراحة

      دمت بخير

      حذف
  6. كالعاده:)
    ذكريات مبهجه وكلها شقاوة:)
    ايه اللي كان يطلعك فوق كوم البرسيم يا شقيه؟؟؟

    ردحذف
    الردود
    1. هههههههههههههه اللى طلعنى شقاوتى وحبى لاكتشاف الاشياء :)

      دمت بخير نيسان

      حذف
  7. كم هي جميلة الذكريات وخاصة ذكريات الطفولة ..

    استمتعت بمروري هنا اليوم ..

    ردحذف
  8. بجد انا مبتسم و بس

    نفسى اعيش يوم بالشكل ده

    بجد فى حاجات كتير اختغت من حياتنا

    يارب كلنا نحضر فرحك و يكون فى الغيط
    و لا عايزة تعمليه فى اوتيل
    هههههههههههههههههه

    تحياتى

    ردحذف
    الردود
    1. وليه بقى مش بتضحك
      امم اصلك متابعتش اللى فات واتحدى هتضحك بقى :)

      مينفعش افراحنا تكون كده احنا هنا لكن نختلف :)

      وبعدين هى ريف صحيح بس مظاهر المدنيه واضحه جدااا

      دى كانت رحلات نادره خلال العمر لذلك فهى جميله :)

      دمت بخير

      حذف
  9. و كمان صفاء أبو السعود !!
    ..لدي مشروع، أعلم أن صعب تنفيذه، و لكني في يوم من الايام قد أتشجع و أقوم به...نفسي كل مكان زرته و أنا صغير أرجع أزوره تاني..صحيح هيبقى صعب خصوصا ان لي ذكريات في الصعيد و أنا طفل و العودة لهذه الامكان أظنه صعب جدا علي..و لكن في يوم ما ...ممكن !!
    ..جميلة جدا ذكرياتك..و جميلة طريقة حكيك لها..تحياتي

    ردحذف
    الردود
    1. احيانا بقول مش صعب لكن الحياه علمتنى ان هناك مستحيل رغم انه يبان سهل

      انا فكرت اجمع العابى كلها اشتريها تانى

      شكرا لوجودك هنا

      دمت بخير

      حذف
  10. مساء الغاردينيا رؤى
    :)
    شايفة الإبتسامة بجد دا الي سابع البوست بتاعك على وشي وقلبي
    بجد حسيت ببراءة طفولتك واستمتعت بذكرياتك
    مش انتي الي كبرتي يارؤى لأنه مهما كبرنا جوانا أطفال
    تقدري تقولي الزمن والناس تغيرت حتى أطفال النهردة مش اطفال
    ماشاء الله عليهم :)"
    ;;
    ;
    لروحك عبق الغاردينيا
    كانت هنا
    Reemaas

    ردحذف
    الردود
    1. مساء الفل ريماس

      سعيدة بوجودك هنا وانى سبب ابتسامتك
      هنا دائما اضحك ويضحك كل من يمر :)

      فعلا اطفال النهرده غيييييرنا زمان
      مش عارفه ولادنا هيعملوا فينا ايه هههههه شكلى المفروض ارجع للشقاوة معاهم ههههه


      دمت بخير

      حذف
  11. ههههههههههه
    رؤى سوري كلمة سابع مش عارفة جت منين
    تقولي وحدة حامل بالسابع ههههههه
    كنت اقصد سابه البوست بتاعك
    بس بكتب من الموبايل سوري :)

    ردحذف
    الردود
    1. هههه ولا يهمك
      كتر خيرها الكلمة الغلط خلتك تعلقى هنا مرتين :)

      يارب تكونى بخير

      حذف
  12. كنت من شوية متعصبة
    لما دخلت وقريت البوست وخصوصا من اول العنب
    ابتديت اضحك
    ربنا يسعدك

    ردحذف
    الردود
    1. بجد هنا اللى متضايق يدخل يضحك
      والله انا كمان بفضل ايام مليش نفس واقول مش عارفه اكتب هنا اى حاجة بس اول ما ابدأ ببدأ الضحك كمان

      دمت بخير

      حذف
  13. كل واحد بيعيش بداخله طفولته
    زكريات جميله بس بصراحه من ساعه العسل والعنب وانا جوعت ينفع كده ندخل المدونه عندك تجوعينا ههههههههههههه

    ردحذف
    الردود
    1. ههههههههه امال لو كنت شوفته

      ياللا بقى

      معلش

      :)

      دمت بخير

      حذف
  14. ياااه اجمل الذكريات هى ذكريات الطفوله
    فيها النقاء والبراءه اللى بنفتقدها كتير دلوقتى

    الاغنيه دى بعشقها بجد :)))

    ردحذف
    الردود
    1. اكييييد كنتى بتسمعيها كتير ايام زمان :))

      انا كمان بموت فيها

      دمت بخير

      حذف
  15. ما اجمل زكريات الطفولة التى كنا لا نحمل فيها هما ولا مسئولية على اكتافنا
    تحياتى

    ردحذف
    الردود
    1. لابد من ان نصل لهنا حيث المسئولية لنشعر بجمال ما كنا فيه


      دمت بخير

      حذف
  16. سعيدة بتواجدي الأول هنا

    في موقع ذكرياتك الجميلة
    ورقة الطفولة العذبة والمميزة بشقاوتها ورونقها
    أسلوب شيق و يحمل نبرة جميلة

    تحيتي

    ردحذف
    الردود
    1. وانا سعيدة بوجودك هنا يا زينه
      ويارب دايما تلاقى هنا ما يسعدك

      دمت بخير

      حذف
  17. السلام عليكم

    مجددا عدت بعدما قرأت تدوينتك البارحة وعلقت عليها اكتشفت بعدها أن تعليقي لم يصل بسبب المتصفح..
    دائما نحن نربط تفاصيل ذكرياتنا بأماكن معينة تبقى رائعة في نظرنا إلى الأبد وتتكون بيننا وبينها حميمية من نوع خاص، قد تتغير الأمكنة لكن تبقى ذرياتنا على حالها..
    أذكر أنه في أيام طفولتي كنا نلعب في أرض خضراء واسعة بجوار منزلنا، كان بها نبات يدور كأنه ساعة حتى كنا نسميه الساعة:) وكانت هناك أيضا زاوية مرتفعة عن باقي المساحة بها شجرة خروب كنا نجري ونسعد بالوصول إلى الأعلى وكأننا بلغنا قمة القمم.. تلك الأرض الآن لم تعد خضراء، صارت تملؤها البنايات السكنية التي لم تترك ركنا أخضرا في المدينة، لكن ذكرياتنا فيها لا تزال عالقة في أذهاننا وقلوبنا..
    احرصوا قدر ما تستطيعون على الحفاظ على أرضكم فهي أغلى من أي ثمن !

    تقبلي تحيتي ومودتي صديقتي رؤى

    ردحذف
    الردود
    1. نفس الكلام يا نوال كتير من الاراضى عندنا تحولت لمبانى كتبت تدوينه عن ذلك اسميتها لون ارض فى حملة الوان

      ارضنا بعيده نسبيا عن المبانى وربنا يستر :)

      دمت بخير

      حذف
  18. الله الله على الذكريات الحلوه
    جميله اوى يا رؤى
    بوست رقيق اوى

    ردحذف
    الردود
    1. تسلميلى يا هبه
      الاجمل مرورك

      دمت بخير حبيبتى

      حذف
  19. يااااااااه ..اجمل حاجه زكريات الطفوله ايلي بتفضل في الزاكره...فكرتيني كتير بنفسي وانا صغيره

    ردحذف
    الردود
    1. اكيد كلنا عندنا حجات مبننسهاش ابدا

      وغالبا هتكون حجات تفرحنا


      دمت بخير اميرة

      حذف
  20. كلامك بسيط و سردك يدخل القلب

    أنا دائماً في حالة حنين للماضي
    حسيتها هنا أوي

    بس إنت فين التدوينه دي قديمه عايزين الجديد :)

    تحياتي لكِ

    ردحذف
    الردود
    1. لا مش قديمة اوى كنت مختفيه بس يومين بس الجديد دايما هناك فى المدونه الاولى هنا للزكريات فقط :)

      نورتى يا شيرين اخيراااااااا :)

      دمت بخير ومبسوطه انها عجبتك

      حذف
  21. أختي المبدعة

    بإذن الله المستقبل أجمل بهذه البراءة وبهذه النفس الطيبة

    بنياتكم ترزقون

    قصص وذكريات رأئعة جداً

    موفقة أختي

    ردحذف
  22. الجميل والممتع في الذكريات أنها مهما كانت الظروف التي عيشت فيها الاحداث ولو قاسية تبقى الذكريات حلوة وممتعة...
    الريف مانح العطاء ومانح الجمال، مهما وصفنا لن نستطيع أن نحدد جمالية المتعة فيه، خاصة لو كان لطفولتنا نصيب من الزمن هناك.

    بعفوية نقلتنا إلى عالمك. أشكرك.

    ردحذف
  23. كثيرا ما نرجع إلى طفولتنا حين شعورنا بأي ألم أو ملل..
    وماأجملها من ذكريات ومن طفولة بريئة..
    مروري الاول على مدونتك..كان جميلا وأتمنى ألا يكون الأخير من نوعه..
    وأدعوكِ لزيارة مدونتي الجديدة..
    http://sarataherlulu.blogspot.com/

    ردحذف
  24. رؤى


    اشتقت للجمال هنا

    ردحذف
  25. عيشتيني اياااااااااااااااااام جميلة معاكِ
    اول مرة اعرف ان العنب بيجيب حساسية في الوش وبيطلع شنب للرجالة ههههه

    انتي كنتي شقية جداً على فكرة بقى هما بيركبوا على عربية الكارو ويعيطوا وانتي فوق تلاتة متر ولا همك !! ههههههههههه

    بتحاربي السمك الصغير شوريرة شوريرة يعني (:

    تعرفي كان نفسي يبقى عندي ارياف وزراعة واجري واللعب الحمد لله عشت معاكِ الايام دي من خلال سردك ليها

    مامتك عندها حق تفتخر بمهرها الارض عرض واللي يهادي بالارض اكيد حد هيصونها قوي وهيحطها في عنيه


    اين جديد؟

    لولا

    ردحذف
  26. كلّ عام و أنت بخير و محبّة

    أعاده الله على الأمّة بالنّصر و العزّة و الرجوع إلى
    أمر الله ،،،

    تقديري

    صاحب الزمن الجميل

    *

    ردحذف
  27. كل عام وانت بألف خير بمناسبة
    عيد الأضحى أعادة الله علينا وعليكم بالخير
    بالمن والمسرات ...
    قصة جميلة ورائعة ..واللي ماله أول
    ماله تالي ..ذكريات الطفولة دائماً
    كل براءة ...
    أرق التحايا قلبية

    ردحذف

مرحبا بكم فى عالم طفولتى